Fərəh Tahirova
Musiqişünas və Pedaqoq
Bioqrafiya
Azərbaycanlı musiqiçi musiqi təhsilinə 7 yaşında musiqi məktəbində başlamışdır. Yeddi illik intensiv fortepiano təhsilindən sonra musiqi kollecində təhsilini davam etdirmiş, burada fortepiano ixtisası üzrə fərqlənmə ilə məzun olmuşdur. Hələ 8 yaşında ikən Azərbaycan televiziyasında çıxış etməyə başlamışdır ki, bu da onun peşəkar musiqi fəaliyyətinə erkən başlanğıc olmuşdur.
O, daha sonra Bakı Musiqi Akademiyasında Musiqişünaslıq ixtisası üzrə ali təhsil almış və bu sahə üzrə fərqlənmə ilə məzun olmuşdur. 2006–2010-cu illərdə Akademiyanın Elmi-Tədqiqat Mərkəzində baş elmi işçi kimi fəaliyyət göstərmişdir. Peşəkar karyerası boyunca o, fortepiano müəllimi, konsertmeyster və musiqi tarixi üzrə müəllim kimi də çalışmışdır.
2011-ci ildə İncəsənət fəlsəfəsi üzrə fəlsəfə doktoru elmi dərəcəsini qazanmışdır. Hal-hazırda Vyanada yaşayan musiqiçi, “Culture Meeting Point” mədəniyyət cəmiyyətinin bədii rəhbəri olaraq fəaliyyət göstərir və Vyana Musiqi Məktəbində fortepiano və musiqi nəzəriyyəsi dərsləri verir.
Müəllif kimi o, Şostakoviç və Azərbaycan musiqi mədəniyyəti ilə bağlı bir sıra kitabların müəllifidir. Bu əsərlər Moskva və Aşqabad kimi nüfuzlu beynəlxalq kitab sərgilərində təqdim olunmuşdur.
Onun fəaliyyəti yalnız elmi və bədii yaradıcılıqla məhdudlaşmır – o, eyni zamanda Avstriya, Macarıstan və Slovakiya kimi ölkələrdə beynəlxalq musiqi festivallarının və konsertlərinin təşkilatçısı və rəhbəri olmuşdur. Musiqi dünyasının nüfuzlu tədbir və simpoziumlarında iştirak etmiş, o cümlədən Mstislav Rostropoviçin rəhbərliyi altında keçirilən Şostakoviçin 100 illik yubiley festivalı və Beynəlxalq Musiqi Təhsili Cəmiyyəti (ISME) konfransında çıxış etmişdir.
40-dan çox açılış nitqi ilə çıxış etmiş, müxtəlif media platformalarında yer almış və solo piano ifaçısı kimi səhnəyə çıxmışdır. Onun diqqətəlayiq fortepiano ifacisi kimi çıxışlarından biri 2017-ci ildə Bratislavadakı Polşa Mədəniyyət İnstitutunda baş tutmuşdur. Vyanada keçirilən “Classic Pure Vienna” və “Sounds of the Land of Fire” kimi beynəlxalq piano müsabiqələrinin münsiflər heyətinin üzvü olmuşdur.
Alim kimi o, Vyana Musiqi və İfaçılıq Sənəti Universitetində (mdw) akademik təqdimatlarla çıxış etmiş, xüsusilə Şostakoviçlə Azərbaycan bəstəkarları – Cövdət Hacıyev və Qara Qarayev arasındakı əlaqələr barədə araşdırmalar aparmışdır. O, konservatoriyaya hazırlıq kursları üçün Avropa, Rusiya və Azərbaycan musiqi tarixini əhatə edən dərslik müəllifidir. Bundan əlavə, beynəlxalq elmi jurnallarda 50-dən çox məqaləsi dərc olunmuşdur. Onun tədqiqat sahələrinə müasir musiqi təhsili daxildir.
Əmək fəaliyyətinə və yaradıcılığına görə aşağıdakı beynəlxalq mükafat və təltiflərə layiq görülmüşdür:
“My Piano Time” metodu üzrə Beynəlxalq Sertifikat (ABŞ, 2025),
Finlandiya və Avstriyada keçirilən fortepiano müsabiqələrində tələbə hazırlığına görə diplomlar (2023–2024),
"Florida Keys" Beynəlxalq Musiqi Müsabiqəsi çərçivəsində "LYRE" Ukrayna Musiqi və İncəsənət Festivalının tanınması (ABŞ, Florida, 2022),
“Hello, Piano” tədris metodu üzrə sertifikat (Webinar, Almaniya, 2021),
Azərbaycan Respublikası Gənclər və İdman Nazirliyinin Gənclər üçün Mədəniyyət mükafatı, „HUMAY“ mükafatı,
Azərbaycan diasporası ilə iş üzrə Dövlət Komitəsinin Azərbaycan mədəniyyətinin xaricdə təbliğinə verdiyi töhfəyə görə medalı
O bir musiqiçi, pedaqoq, və mədəniyyət təbliğatçısı kimi çoxşaxəli fəaliyyəti ilə Azərbaycan musiqi irsini Avropa mədəni mühitində uğurla təmsil etməkdə davam edir.